Нема место за Хејли и Помпео во новиот тим на Трамп

Новоизбраниот претседател на САД, Доналд Трамп во саботата изјави дека од поранешната републиканска претседателска кандидатка Ники Хејли и од поранешниот државен секретар Мајк Помпео нема да биде побарано да се приклучат на неговата администрација.

„Нема да ја поканам поранешната амбасадорка Ники Хејли или поранешниот државен секретар Мајк Помпео да се приклучат на администрацијата на Трамп, која моментално е во фаза на формирање“, објави Трамп на социјалните мрежи. „Многу уживав и ја ценев работата со нив претходно и би сакал да им се заблагодарам за нивниот ангажман за нашата земја“.

Трамп се среќава со потенцијалните кандидати да служат во неговата администрација пред неговата инаугурација како претседател на 20 јануари. Ројтерс во петокот објави дека Трамп се сретнал со истакнатиот инвеститор Скот Бесент, кој е потенцијален кандидат за министер за финансии на САД.

Хејли, поранешна гувернерка на Јужна Каролина, која служеше како амбасадорка на САД во Обединетите нации за време на Трамп, го поддржа Трамп за претседател и покрај тоа што жестоко го критикуваше кога се кандидираше против него на партиските прелиминарни избори.

„Бев горда што работев со претседателот Трамп бранејќи ја Америка во Обединетите нации“, рече Хејли на социјалните мрежи. „Му посакувам нему, и на сите кои служат, голем успех да не придвижи напред кон посилна, побезбедна Америка во следните четири години“.

Помпео, кој исто така служеше како директор на Централната разузнавачка агенција за време на Трамп, беше спомнат во некои медиумски извештаи како можен секретар за одбрана и исто така беше виден како потенцијален републикански претседателски кандидат, пред да објави во април 2023 година дека нема да се кандидира.

За време на неговиот прв мандат како претседател, Трамп даде некои клучни кадровски најави преку објави на социјалните мрежи.