Нема место за Вучиќ во Хрватска, Милановиќ го откажа самитот

Вучиќ во Хрватска веќе нема да може, соопшти кабинетот на хрватскиот претседател Зоран Милановиќ, кој одлучи да го откаже годинешниот состанок на Процесот Брдо-Бриони, планиран за мај во Хрватска. Одлуката дојде со образложение дека политичките изјави и постапки на српскиот претседател Александар Вучиќ во последните денови и недели се спротивни на целите на иницијативата, ги нарушуваат меѓудржавните односи и го загрозуваат мирот и стабилноста во југоисточна Европа.

Со овој потег, Милановиќ не ја затвори само вратата за едно дипломатско доаѓање, туку практично го стопираше и целиот регионален формат што Хрватска и Словенија го иницираа за унапредување на соработката и за забрзување на европските интеграции на земјите од Југоисточна Европа. Во соопштението од неговиот кабинет се наведува дека нов состанок ќе има дури кога ќе се создадат услови за тоа, по консултации со словенечката претседателка Наташа Пирц-Мусар, која е ко-претседавач со процесот.

Одлуката не доаѓа во политички вакуум. Хрватските медиуми потсетија дека Вучиќ по локалните избори во Србија зборуваше за наводна логистичка поддршка од соседна држава, а претходно го спомена и разговорот со Владимир Путин, кого, според сопствените зборови, го информирал за, како што тврдеше, сојуз меѓу Загреб, Приштина и Тирана. Во таков контекст, отказот на самитот изгледа како јасна политичка порака дека Загреб повеќе не сака да глуми нормалност додека од Белград стигнуваат обвинувања што дополнително ја трујат регионалната клима.

Оваа одлука отвора и пошироко прашање за иднината на регионалните формати кога самите лидери што треба да седнат на иста маса веќе ја разградуваат основната доверба. Наместо дипломатска фотографија од Бриони, регионот доби уште еден доказ колку брзо политичкиот јазик може да ја урне и онаа малку преостаната стабилност меѓу соседите.