Непалскиот премиер поднесе оставка, 19 загинати во протестите на „Генерација Z“

По една недела забрана, властите денеска ја укинаа блокадата на социјалните мрежи која предизвика дополнителен бран незадоволство. „Владата ја укина забраната воведена минатата недела,“ соопшти министерот за комуникации и информатичка технологија, Притви Суба Гурунг.

Според официјалните податоци, во протестите загинале 19 лица, а повеќе од 100 се повредени. Демонстрациите, наречени „Протести на генерацијата Z“, се проширија од главниот град Катманду и во други градови низ Хималајската земја.

Локалните власти воведоа полициски час во Катманду со цел да ги запрат собирите. „За време на полицискиот час нема да бидат дозволени протести, масовни собирања или состаноци,“ изјави Чабилал Ријал, управител на градскиот округ.

Организаторите, пак, најавија нови акции во знак на жалост за загинатите и порачаа дека протестите се израз на длабоко незадоволство кај младите поради корупцијата и недостигот на економски можности.