Skip to content
Израелскиот премиер Бенјамин Нетанјаху му нареди на Генералштабот на израелската армија да изведе „итни и силни удари“ врз цели во Појасот Газа, поради, како што е соопштено, повторени прекршувања на примирјето од страна на Хамас.
Од кабинетот на премиерот соопштија дека одлуката е донесена по итен состанок на државниот безбедносен тим, посветен на израелскиот одговор на новите напади врз израелските сили на југот на Газа.
Според весникот Times of Israel, засилените тензии следуваат по инцидент во кој израелски војници биле нападнати, како и по последниот потег на Хамас, кој ги предаде остатоците од неколку убиени заложници.
Меѓу предадените тела е и она на Офир Карфати, чиј труп беше пронајден во Газа уште во декември 2023 година, два месеца по неговата киднапација во нападите на Хамас.
Израелската влада го осуди овој чин како „тешко прекршување на договорот“, со кој Хамас се обврзал да ги врати телата на 13 убиени заробеници што сè уште се наоѓаат во Газа.
Како што се наведува во официјалното соопштение, новите воени акции ќе бидат спроведени веднаш, со цел „да се одговори решително на секој обид за саботажа на примирјето и за напад врз израелските граѓани и војници“.
Ситуацијата во Појасот Газа повторно станува крајно напната, со опасност од целосно укинување на кревкото примирје што беше постигнато во почетокот на есента.
