Skip to content
Оперативната команда на Министерството за одбрана на Обединетите Арапски Емирати (ОАЕ) соопшти за третата успешна испорака на хуманитарна помош во северниот дел на Газа, извршена од воздухопловните сили на ОАЕ и на Египет, јавија медиумите во ОАЕ.
Обезбедувањето поддршка е дел од иницијативата насочена кон ублажување на страдањата на опустошениот од војната палестински народ. Заеднички тимови од двете земји ја изведоа операцијата со авиони кои превезуваа околу 38 тони храна и медицинска помош. Вкупниот обем на испораки преку иницијативата достигна 116 тони од нејзиниот почеток.
Иницијативата наречена „Птици на добрината“ е дел од хуманитарната операција „Храбар витез 3“, која беше покрената на 5 ноември по налог на претседателот Шеик Мохамед бин Зајед Ал Нахјан. Оваа хуманитарна операција ја одразува решеноста на ОАЕ и Египет да ги дадат сите форми на хуманитарна поддршка на палестинскиот народ и да ги надминат тешкотиите за да се олеснат страдањата на Палестинците.
