Објавен идентитетот на напаѓачот од Цетиње, полицијата вели дека е вооружен и опасен

Осомничениот за денешното масовно убиство во Цетиње во Црна Гора, според хрватските медиуми е Ацо Мартиновиќ, 45-годишник од Цетиње.

Тој денеска по расправија во една кафеана во Цетиње убил неколку лица, меѓу кои и членови на неговото семејство, повредил тројца, а потоа побегнал, како што дознава CDM.me, со комби „фиат“ во темна боја.

„Полицијата ги презема сите активности од нејзина надлежност за пронаоѓање на осомничениот, а на терен се сите расположливи полициски организациски единици, вклучително и Специјалната полициска единица“, велат од Управата на полицијата.

Тие напоменуваат дека Мартиновиќ е вооружен и опасен и уште еднаш директно упатија апел до граѓаните на Цетиње да бидат присебни и да останат во своите домови и да не пуштаат непознати лица во домовите, додека полицијата ги презема сите мерки и дејствија со цел да ги заштити и да ги гони виновниците за овој настан.

Четворица повредени од Цетиње се пренесени во Клиничкиот центар на Црна Гора во Подгорица, според црногорските медиуми.

Како што е кажано за РТЦГ, тројца мажи и една жена биле донесени во КЦЦГ.