Skip to content
Бившиот претседател на Советот за унапредување и надзор на ревизијата (СУНР) Ване Цветанов се соочува со официјален обвинителен предлог за злоупотреба на службена положба. Специјалното обвинителство за организиран криминал тврди дека во периодот од 2021 до март 2022 година Цветанов „широко ја отворал“ касата на институцијата, обинителството ги наброја ставките за кои се товари:
- 1,06 милиони денари за ресторански сметки, хотелски ноќевања во Скопје, пијалаци и тоалетни производи – трошоци што обвинителството ги смета за личен луксуз.
- 300 350 денари исплатени за конференција што никогаш не се одржала.
- 317 859 денари за такси‑услуги и рента‑кар.
- 741 649 денари за патувања и пенали по откажани аранжмани дома и во странство.
Истовремено, без одобрение од Советот, Цветанов склучил договори со осумнаесет надворешни соработници (1,93 милиони денари) и ангажирал сопствената партнерка Дунавка како „советник за специјални цели“, што ѝ овозможило службени патувања на товар на буџетот. Само по основ на дневници и патни трошоци, парот му нанел штета од 93 800 денари на Советот, стои во обвинението.
Обвинителството наведува дека набавките биле реализирани без процедура по Закон за јавни набавки, а договорите – без одлука на надлежниот орган. За злоупотреба на службена положба Цветанов се соочува со казна затвор до 10 години.
Одбраната на поранешниот прв човек на СУНР засега не даде јавен коментар; неговата сопруга не е предмет на обвинението, но вмешаноста во трансакциите може да отвори нови правни прашања. Случајот се следи од Антикорупциската комисија, која веќе поднесе посебна иницијатива за судир на интереси.
Со ова обвинение, јавноста повторно се соочува со прашањето: колку е пропустлив системот за контрола на трошењето јавни пари и дали ќе се стабилизира довербата кога висок функционер ќе одговара за милионски „државни“ фактури?
