Од утре важат новите правила на границите со земјите од Европската Унија

Од 10 април започнува целосната примена на новиот Европски систем за влез и излез (EES – Entry/Exit System) на надворешните граници на Европската унија, вклучително и за македонските патници што влегуваат во шенген‑зоната. Тоа значи дека на границите ќе се замени традиционалното печатење на пасоши со електронска евиденција, а влезовите и излезите ќе се регистрираат дигитално со обезбедување на основни биометриски податоци како отпечатоци од прсти и фотографија, со цел побрза идентификација и поефикасно следење на времето на престој согласно правилото „90 дена во период од 180 дена“. Ова важи за сите државјани што патуваат краткорочно од земји што не се членки на ЕУ, меѓу кои е и Северна Македонија. 

Со воведувањето на ЕЕС, патниците може да очекуваат поопширни контроли и можни подолги чекања на граничните премини, особено во почетната фаза на примената, бидејќи системот ќе бара обработка на биометриски податоци и електронско внесување на информации за влез и излез. 

Покрај тоа, новите правила може да влијаат и на транспортните работници и камионџиите кои се жалат на сложеноста на системот и почнале протести на регионално ниво поради влијанието на регулативите на нивната работа, иако патничкиот сообраќај продолжува да се одвива без промени за возила и автобуси.