Орбан предупредува: Брисел се подготвува за војна со Русија до 2030 година

Унгарскиот премиер Виктор Орбан денес изјави дека Брисел се подготвува за војна со Русија и дека веќе постои целен датум за влегување во војната – 2030 година.

Тој напиша на својата Фејсбук страница дека целта на програмата за вооружување иницирана од Брисел е да ја направи Европската Унија подготвена за војна до 2030 година, што е и целен датум за забрзаната постапка за членство на Украина во ЕУ, пренесува Хирадо.

„Темни облаци се собираат на небото над Европа. Брисел се подготвува за војна со Русија и веќе постои целен датум за влегување во војната: 2030 година“, предупреди Орбан, пренесува Танјуг.

Во оваа смисла, тој додаде дека основачкиот договор на ЕУ наведува дека во случај на вооружен напад на територијата на една од земјите-членки, другите земји-членки се обврзани да ѝ обезбедат на таа држава сета достапна помош, поради што приемот на Украина, разорена од војната, во ЕУ би резултирал со непосредно влегување во војната.

Според него, ова значи дека следната година би можела да биде последната изборна година на Унгарија кога навистина може да одлучи за прашањето на војната и мирот. Користејќи го примерот за имиграцијата, Орбан го привлече вниманието на фактот дека постојат одлуки што не можат да се коригираат подоцна.

„Ако не ја изградивме оградата во 2015 година, мигрантите веќе ќе беа тука. Ако донесеме погрешна одлука во 2026 година, ќе биде предоцна да ја поправиме до следните избори во 2030 година. Играта нема да заврши добро. Кој сака мир, нека ни се придружи“, заклучи Орбан.