Ова се најдобрите европски градови за патување доколку имате мали деца

Ова се најдобрите европски градови за патување доколку имате мали деца, според новиот „Family Breaks Index“ на платформата LateRooms, кој ги рангира најлесните европски градски одмори за семејства од Велика Британија со бебиња, мали деца и постари деца. Анализата, објавена во март, ги мери просечното времетраење на летовите, трансферот од аеродром до центар, можноста за движење пеш, пристапноста, бројот на семејни атракции и достапноста на сместување погодно за семејства.

На врвот на листата е Копенхаген, кој е оценет како најлесна и најпријатна дестинација за семеен градски одмор. Главната предност на данската престолнина е што од аеродромот до центарот се стигнува за околу 15 минути, а градот има и многу висока оценка за пешачка достапност, што значи дека голем дел од атракциите можат да се посетат без долги и комплицирани трансфери. Во анализата се издвојуваат и Тиволи, кој често се поврзува со инспирацијата за Дизниленд, како и Њухавн, како места што лесно ја спојуваат забавата за деца со опуштена семејна прошетка.

Веднаш зад Копенхаген е Берлин, кој е издвоен како најдобар за семејни атракции, со повеќе од 200 активности погодни за деца, меѓу нив зоолошката градина, интерактивни музеи и големи паркови. Трета е Барселона, која се наметнува како најдобра комбинација од град и плажа, со повеќе од 400 семејни атракции и простор за престој на отворено. Во првите десет се и Фиренца, Амстердам, Валенсија, Базел, Краков, Прага и Виена.

Листата покажува дека за семејствата со мали деца најважни веќе не се само убавите разгледници и познатите знаменитости, туку и нешто многу попрактично: колку брзо се стигнува од аеродром, колку лесно се движи низ градот и дали има доволно содржини што нема да го претворат одморот во дополнителен стрес. Токму затоа, рангирањето повеќе личи на водич за преживување на семејно патување, отколку на класична туристичка листа.