[Видео] Македонец во авион совладаа маж што викал „имам бомба“

Летот на „Изиџет“ EZY871 од Лутон за Глазгов утринава мораше итно да се приземји, откако патник се закани дека носи експлозив. Инцидентот се случи околу 08:00 часот, едвај четириесетина минути по полетување.

Очевидци раскажуваат дека мажот излегол од тоалетот во задниот дел на кабината, кренал раце и извикал „Алаху акбар, имам бомба!“. Кратко потоа додал дека сакал „да му испрати порака на Трамп, кој е во Шкотска“. Агресијата ескалирала кога ги турнал стјуардите што се обиделе да го смират.

„Во првиот момент сите помисливме дека е лоша шега, сè додека не почна да ги турка вработените“, вели Ема Робертсон (34) од Глазгов, патничка во ред 19. „Тогаш еден господин скокна, го собори на под и му ги врза рацете.“ На снимка од мобилен телефон се гледа како тројца патници меѓу кои и еден Македонец идентификуван како Зоран Настески кој сочно пцуе заедно со член на екипажот соборуваат и го држат осомничениот.

Пилотот веднаш побара приоритетно слетување; „Ербасот A320“ се симна на пистата во Глазгов 15 минути подоцна, каде го чекаа вооружена полиција и противтерористичка единица. Шест полицајци го извлекоа мажот од авионот, а патниците – вознемирени, но неповредени – беа евакуирани за дополнителна безбедносна проверка.

Полицијата на Шкотска потврди дека уапсен е триесет и седумгодишен британски државјанин, кој ќе се соочи со обвиненија за лажно прикажување закана по безбедноста на летот и попречување на екипажот. Претрес на багажот и тоалетот не открил експлозивна направа.

„Благодарни сме за брзата реакција на екипажот, патниците и безбедносните служби“, соопшти „Изиџет“. По едночасовна пауза, аеродромот во Глазгов се врати на редовниот распоред.

Инцидентот доаѓа во време кога американскиот претседател Доналд Трамп престојува во Шкотска, каде вчера беше снимен на својот голф‑ризорт во Тарнбери. Шкотското министерство за транспорт соопшти дека мерките за аеродромска безбедност остануваат на зголемено ниво.

🚨#BREAKING: A brave Serb 🇷🇸 passenger managed to overpower a man who screamed "Alahu Akbar" on the plane and threatened that he had a bomb. The incident happened on Sunday, July 27, on an "EasyJet" flight from Luton to Glasgow. Well done bro! pic.twitter.com/b7UEjnJF19

— EAGLE 🇷🇸 (@SerbEagleAI) July 28, 2025