Skip to content
Печатите на Алијанса за Албанците, му припаѓаат на крилото на Арбен Таравари, со што судскиот спор што со месеци ја следи внатрепартиската поделба добива нов пресврт. Информацијата во јавноста прво ја соопшти крилото предводено од Зијадин Села, кое истовремено обвини дека зад последната одлука стои политичко влијание и најави жалба до Апелација.
Според објавата, Основниот суд во Тетово донел одлука со која партиските печати му припаднале на таборот на Таравари, а од крилото на Села оценуваат дека таквиот развој не е само правно, туку и политички мотивиран. Во нивната реакција, пренесена од Телма, се наведува дека процесот траел неколку години, дека предметот двапати бил враќан и трипати разгледуван во основниот суд, што тие го толкуваат како дополнителен аргумент дека врз постапката имало притисоци.
Оваа одлука доаѓа по долг период на раскол во партијата, кој се отвори пред парламентарните и претседателските избори во 2024 година, кога спорот околу изборниот настап ја подели Алијанса за Албанците на две спротивставени структури. Во февруари 2024, Централното собрание на партијата донесе иницијатива за разрешување на Таравари, додека неговото крило подоцна одржа и посебен вонреден конгрес за внатрешно консолидирање.
Токму затоа одлуката за печатите има тежина што оди далеку над административно прашање. Таа повторно го отвора спорот за тоа кој има легитимитет да настапува во име на партијата и кој ќе го носи нејзиниот институционален континуитет.