Skip to content
Во Македонија пензионерите со години се третираат како гласачка алатка, а ВМРО-ДПМНЕ е шампион во политичкото манипулирање со нивната мака. Сега, кога партијата повторно се наоѓа во позиција да вети “спас” за пензионерите, вреди да прашаме: за кого всушност се овие ветувања? За достоинствена старост или за партиска добивка? Зошто со децении го храневме пензискиот систем додека други земаа пари на рака и беа задоволни?! Вратете ни ги тогаш тие пари што ги плаќавме ако имавме поголеми плати и бевме чесни граѓани кои го хранеа и пензискиот систем и државата!
Во времето на ВМРО-ДПМНЕ, пензиите не беа резултат на системско унапредување, туку средство за политички маркетинг. Покачувањата беа минимални, често од неколку стотици денари, најчесто пред избори. Пензионерите беа користени како публика за партиски трибини и соопштенија, додека нивната реална куповна моќ се топеше под тежината на инфлацијата и партискиот популизам.
Политиките на ВМРО-ДПМНЕ беа осмислени не за долгорочна сигурност на пензионерите, туку за моментален публицитет. Наместо институционални решенија за стабилен пензиски фонд, им понудија предизборни покачувања, подароци и субвенции, додека од друга страна системски ја ослабуваа пензионерската база со непланирани трошоци и без покритие.
И додека зборуваа за “грижа”, токму во нивно време се укинаа двојните годишни усогласувања на пензиите со трошоците на живот. Пензионерите беа лишени од механизам за заштита на нивниот стандард. Потоа, за да се замачка сликата, беа доделувани симболични суми – линеарно, за сите подеднакво, како сите да имале еднакви работни биографии и уплати.
Денес, иронично, истата партија која ги понижуваше со “подароци” од 300 денари, се јавува како нивен спасител. Ветуваа линеарно покачување од 5.000 денари, но без визија за иднината на пензискиот систем. Притоа, го премолчат фактот дека истото тоа линеарно зголемување, кога беше предложено од друга влада, го нарекоа “погубно” и “финансиски неодговорно”. Кога тоа им одговараше, ВМРО-ДПМНЕ тврдеа дека буџетот ќе колабира од такви мерки, а денес сето тоа го претставуваат како сопствено постигнување.
Пензионерите не се политички инструмент. Тие се луѓе кои со децении работеле, граделе, придонесувале. Нивната пензија не е милостина, туку заслужен приход. Затоа е навредливо кога ВМРО-ДПМНЕ повторно се обидува да ги третира како електорат за манипулација. Едно е да се понуди вистинско решение со јасен извор на финансирање и визија за следните 10 години. Сосема друго е да се фрлат 5.000 денари пред избори и да се молчи за последиците по пензискиот фонд.
Дополнително, партијата постојано ја искористува болката на пензионерите како алатка за политички обвинувања. Обвиненијата кон политичките противници дека не ги зголемуваат пензиите, доаѓаат токму од тие што системски ја поткопуваа пензионерската сигурност со клиентелистички зделки, лажни ветувања и краткорочни популистички мерки.
Додека ВМРО-ДПМНЕ тврди дека ја “исправува неправдата”, пензионерите со право прашуваат: зошто таа неправда постоеше токму додека вие бевте на власт? Зошто ја укинавте законската обврска за усогласување на пензиите? Зошто ја девалвиравте вредноста на придонесот? Зошто ветувате едно, а спроведувате друго?
Пензионерите денес не бараат милостина, туку вистинска пензионерска правда. Тие не сакаат повеќе да бидат трофеј во партиски натпревар. Тие сакаат систем што функционира – независно кој е на власт. А ВМРО-ДПМНЕ мора да разбере: пензионерите паметат. И кога ќе се сетат што добија од оваа партија – ќе речат: малку, понижувачки и непостојано.
Пензионерите сега прашуваат: “За што плаќавме? Вратете ни ги парите!” Не само во смисла на денари – туку достоинството, сигурноста и вистинската грижа. Тие не сакаат веќе да бидат трошење за билборди и платени текстови. Не сакаат изборни покачувања и постизборна заборавеност.
Доста беше манипулација. Време е политиката кон пензионерите да престане да биде сценарио за телевизиски спотови и да стане реална, одржлива, долгорочна стратегија. А ВМРО-ДПМНЕ треба да знае: пензионерите веќе не се наивни. Имаат прашања. И ќе бараат одговори.
