Skip to content
Министерката за одбрана, Славјанка Петровска утрово во Тетово се обрати на првата работна сесија во рамките на конференцијата организирана од македонското претседавање со ОБСЕ посветена на „Родовата еднаквост и еманципација на жените“. Таа се осврна на унапредувањето на вклученоста и лидерството на жените во градењето на мирот и менаџирањето на конфликтите.
-Жените имаат многу важна улога, учествувајќи во мировни преговори и во процесите на донесување одлуки. И, тука не зборуваме за бројки, туку за клучни вредности и квалитет. Зборуваме за градење и позиционирање на жени – лидери кои го користат својот интелект, вештини и потенцијал за градење на одржлив мир. Клучната карактеристика на жените – лидери е нивната храброст и, тоа е нешто што можеме да го видиме секој ден преку храбрата борба на украинските жени, цивили и во униформа, за слободата на нивната држава и безбедноста на украинскиот народ, посочи Петровска.
Министерката подвлече дека не смееме да дозволиме жени – професионалци во своите области, кои работат неуморно и посветено, да останат незабележани и, дека мораме да работиме посветено за женското лидерство да биде составен и неразделен дел од современата безбедносна архитектура. Во однос на местото и улогата на жените во Северна Македонија, министерката Петровска посочи дека и, претставува чест што води едно од покомплексните министерства – одбраната и, дека тоа треба да биде уште една гласна порака за сите млади жени да веруваат во себе и да изберат да бидат дел од одбранбениот сектор, зашто жените навистина можат да направат разлика.
-Во Северна Македонија, препознавањето на ова општествено прашање и силната посветеност на политичките чинители нè доведоа до денешните над 40 отсто жени во Македонското собрание. Ни треба и повеќе жени – министерки во Владата. Како министерка за одбрана повеќе од една година, не можам да бидам задоволна ако не видам повеќе жени на лидерски позиции и затоа ние, жените лидери мораме да мотивираме и да поттикнеме повеќе жени да бидат успешни, рече Петровска.
Министерката додаде дека во Министерството, континуирано се работи на развој на културата за родова еднаквост и родова перспектива и порача дека резултатите се видливи – на последниот конкурс за прием на питомци на Воената академија од 35 примени питомци, од кои 14 се жени. Порача дека Министерството е посветено на соработката со невладиниот сектор на ова поле.
Целта на првата работна сесија насловена „Жени, мир и безбедност: зацврстување на вклученоста и лидерството на жените за инклузивно градење на мирот и менаџирање на конфликти“ е преку размена на искуства на жени – лидери и жени кои се дел од академската заедница да се укаже на важноста и начините за надминување на бариерите во вклучувањето на женската перспектива во превенцијата на конфликтите, кризниот менаџмент и активностите за окончување на конфликти.
