Планината е место каде повторно се наоѓаме себеси – приказни од македонските планинари по повод Светскиот ден на планината

По повод Светскиот ден на планината, членовите на Планинарскиот клуб „Љуботен“, кој годинава одбележува значајни 100 години постоење, за Рацин.мк открија што за нив значи планината – простор на слобода, училиште за трпение и извор на силна, чиста енергија.

Планинарот Владимир Златковски вели дека планината за него е место каде што повторно се наоѓа себеси. Во нејзината тишина ја чувствува слободата, а во нејзината големина ја гледа и својата сила и својата слабост. „Таа е моето засолниште од бучавата, мојата школа за трпение и мој потсетник дека вистинскиот мир постои — само треба да се искачиш до него“, споделува тој.

За планинарката Маријана Димоска Јованоска, секој чекор во планина е ново искуство и нова лекција: како да го пронајдеме мирот, спокојот и слободата. „Планината не учи на благодарност, трпеливост и претпазливост, да се радуваме и на мали нешта. Не инспирира, мотивира и не сплотува“, вели таа, додавајќи дека Македонија има некои од најубавите планини во светот – богатство што треба да го чуваме и сакаме.

Јован Божиновски, претседател на ПК „Љуботен“, потсетува дека кога еднаш ќе ја запознаеш планината – стануваш дел од неа. Тој ја открил Шара во време кога била помалку деградирана и послободна, а денес, благодарение на богатата историја што ја чуваат генерации планинари, ја сака и штити уште повеќе. „Планината е чиста енергија. Јас живеам со планината. За мене, секој ден е Ден на планината“, нагласува Божиновски.

На Светскиот ден на планината, нивните зборови нè потсетуваат дека планините не се само природни убавини – тие се наши учители, наши огледала и наши засолништа. А нашата задача е да ги запознаеме, почитуваме и чуваме, за да останат дом на мирот и силата за сите генерации што доаѓаат.