Skip to content
По неколку дена јавни реакции, обвинувања и медиумски написи за најавеното именување на човек осудуван за измама со животни, градоначалникот на Скопје Орце Ѓорѓиевски направи чекор назад. Наместо Стево Ќирков, чие име предизвика бурни реакции кај активистите и дел од јавноста, Зоолошката градина во Скопје доби нова вршителка на должност – Катерина Костова, внатрешен кадар кој со години работи во установата.
Костова, како што пренесува Плусинфо повикувајќи се на информации од „Скопје1“, е дел од ЗОО Скопје повеќе од шест-седум години и до сега била задолжена за пристап до информации од јавен карактер. Таа ја презема функцијата в.д. директорка по серијата скандали и критики за работењето на градината, во која во последните години угинаа жирафата, слонот, ламата и мајмунот патас, а установата во 2023 година го загуби и кандидатскиот статус за членство во Европската асоцијација на зоолошки градини (ЕАЗА).
Самото именување доаѓа по жестоката јавна реакција на најавата дека на чело на ЗОО ќе застане Стево Ќирков, поранешен советник од редовите на ВМРО-ДПМНЕ во Советот на Град Скопје, за кого активисти за правата на животните и опозициската Левица објавија дека има правосилна пресуда за измама поврзана со продажба на кучиња. Според документите објавени во јавноста, тој добил условна казна зашто на купувачи им наплатувал по околу 600 евра за кучиња, ветувајќи педигре што никогаш не било доставено, а во пресудата се наведува и дека бил поврзуван со други слични случаи.
Левица преку соопштение предупреди дека намерата на Ѓорѓиевски да постави лице со „криминално досие“ на чело на институција која и онака е симбол на негрижа и скандали, е пример за партизација и тргување со јавните установи. Во нивната реакција се посочи дека градската власт Зоолошката градина ја гледа како „партиски ресурс и коалициски плен“, наместо како чувствителна јавна установа што бара висок степен на стручност и интегритет.
Паралелно со партиските реакции, на социјалните мрежи се активираа и здруженија и поединци кои со години ја следат состојбата во Зоолошката. Тие потсетија на случаите со угинатите животни, неостварениот проект за аквариум и честите смени на директори како симптоми на системска негрижа. Ликот на Ќирков, со судска дамка токму за измама со животни, за нив беше последна капка која ја прелеа чашата – и го претвори прашањето за директорското место во тест за тоа колку сериозно градската власт ги сфаќа сопствените одлуки.
Иако формално никаде не е објавено дека Ѓорѓиевски се откажал од Ќирков, факт е дека градот се одлучи за друг потег – в.д. функцијата да ја преземе човек од самиот колектив. Вработени од Зоолошката за „Скопје1“ сведочат дека токму долгогодишното искуство на Костова во установата дава надеж дека барем дел од нестабилноста може да се надмине и дека новото раководство ќе се фокусира на реалните проблеми: условите за животните, инфраструктурата и враќањето на довербата на јавноста и на меѓународните партнери.
Но начинот на кој се стигна до ова решение остава непријатен привкус. Наместо јасна, однапред најавена постапка со јавно објавени критериуми и биографии, јавноста прво дозна за контроверзниот кандидат преку објави на активисти и медиумски текстови, а потоа – по лавина реакции – беше ставена пред свршен чин со ново име. Градската администрација не понуди објаснување зошто воопшто се размислувало за назначување на лице со вакво минато, ниту што точно се променило за за неколку дена да се избере сосема друг профил на в.д. директор.
Случајот со Зоолошката градина уште еднаш ја разоткрива слабата точка на скопската локална власт: кадровската политика во јавните претпријатија и установи, во која клучна валута често се партиските заслуги, а не професионалниот интегритет. Овој пат, јавниот притисок успеа да го сврти кормилото и да спречи формално именување на човек осудуван за криминал со животни. Но прашањето останува – дали ова ќе биде почеток на вистинска професионализација и реформа на ЗОО Скопје, или само брза пи-ар операција за гасење на пожарот.
За Катерина Костова, новата в.д. директорка, првите месеци на функцијата ќе бидат тест и за личниот капацитет и за искреноста на најавеното „рестартирање“ на установата. По години скандали, угинати животни и изгубен кандидатски статус во ЕАЗА, Зоолошката градина нема простор за уште една козметичка смена на табличката на директорската врата. Потребни се јасен план, транспарентни одлуки и доследност – нешто што јавноста, овој пат, очигледно е подготвена внимателно да го следи.