Skip to content
На идната владина седница се очекува да биде донесен предлогот за ограничување на бруто профитната маржа до 10 отсто со која ќе бидат опфатени стотина основни прехранбени производи во трговијата на големо и мало, леб, пекарски и млечни производи, млеко, месо и преработки од месо, дел од конзервните производи, овошје, зеленчук,…
Со ова ново одлагање на ограничувањето на маржите, граѓаните стегаат ремен, бизнисот си прави профити.
Предлогот е изготвен во консултација со трговците и производителите како кракторочна мерка која се предвидува да трае еден месец и да се носи за време на празниците кога обично цените се зголемуваат.
Како што најави министерот за економија и труд Бесар Дурмиши, покрај есенска кошница, ќе има и божиќна, рамазанска, велигденска,…, а целта е да се заштитат граѓаните.
И премиерот Христијан Мицскоки потврди дека е постигнат договор за есенската потрошувачка кошница, а изготвениот предлог завчера бил доставен до Владата.
-На следната владина седница треба да се најде предлогот за есенската потрошувачка кошница. Постигнат е договор и предлогот на Министерството за економија и труд е доставен до Владата. Предлогот е резултат на средбата што ја имаа надлежните со производителите и трговците. Рековме дека работите ќе ги решаваме преку дијалог, беше постигнат договор што ќе биде веќе на следната владина седница. Вчера не беше поради определени технички причини, но сакаме да ги помине и оние филтри како што се Генерален колегиум и Комисија за економски систем. Очекувам на следната владина седница во вторник да биде на дневен ред, рече вчера Мицкоски.
Според Дурмиши, сега не се донесуваат одлуки со сила како порано, туку со сослушување на сите засегнати страни.
-Минатите денови имав состанок со коморите. Ги слушнав нивните барања, ги слушнав забелешките и од производителите и од трговците. Направивме заеднички предлог што Министерството го достави до Владата. Наредната седница очекуваме предлогот да се усвои – бруто профитната маржа да се ограничи до 10 отсто за сите основни прехранбени и земјоделски производи. Коморите не беа добро известени, мислеле дека оваа мерка ќе биде долгорочна, но ние ги информиравме дека мерките се само за празници, со ограничено времетраење. На пример, одлуката за есенската кошница ќе трае еден месец, потоа ќе има божиќна кошница, рамазанска, велигденска,… Се знае дека во овие временски периоди трговците секогаш ги зголемуваат цените, рече Дурмиши.
Мерките, напомена министерот, се во интерес и на граѓаните и на државата.
-Предлогот е есенската кошница да трае еден месец, но на Влада ќе се дискутира. Ќе видиме кои се другите предлози, од другите министерства. Досега одлуките сме ги носеле низ разговор, отворено и транспарентно. Формиравме работни комисии од министерствата за економија, за земјоделство и за финансии, а, како што реков, ги слушнавме и коморите. Не донесуваме одлуки со сила како порано, туку со сослушување на сите засегнати страни, нагласи Дурмиши.
Министерот очекува Законот за нефер трговски практики да стапи во сила кон крајот на овој месец со што дополнително треба да се намалат цените на производите, но и да се стабилизираат на подолг рок. Премиерот изјави дека ако Владата не добие конечен став од бизнис секторот, ќе се оди според предвидената динамика.
