Skip to content
Приказната за обложувачот што заработил близу милион долари на платформата Polymarket не е важна само поради добивката, туку поради времето кога биле поставени облозите. Сомнежот не е дека некој „погодил“, туку дека серија анонимни сметки влегле во пазарот непосредно пред настани што тогаш не биле јавно потврдени, па профитот денес се чита како можно предупредување дека чувствителни геополитички информации можеби протекуваат директно во обложувачкиот систем.
Проверките на меѓународни медиуми покажаа дека на пазарите поврзани со можните американски удари врз Иран биле вложени стотици милиони долари, а аналитичката компанија Bubblemaps проценила дека шест новоотворени сметки оствариле околу 1,2 милиони долари профит откако купувале позиции само неколку часа пред првите експлозии во Техеран. Токму тука лежи суштината на проблемот: не станува збор за долгорочна анализа на тренд, туку за низа прецизни и навремени облози на настани што зависат од воени и државни одлуки.
Сомнежите се продлабочија и со поновите облози за можен прекин на конфликтот. „Гардијан“ и „Маркетвоч“ објавија дека повеќе нови сметки вложиле десетици илјади долари на исходи поврзани со американско-ирански прекин на огнот уште пред јавните сигнали за можни разговори да станат појасни. Во истиот период, шансите за примирје на платформата нагло скокнале, а дел од профилите што се појавуваат во овие облози претходно точно погодиле и удари врз Иран. Тоа не е доказ за кривично дело, но е доволно за да отвори сериозно прашање дали на вакви платформи се тргува со претчувства или со доверливи информации.
Под притисок на ваквите случаи, Polymarket деновиве ги заостри сопствените правила и објави дека забранува тргување врз основа на украдени доверливи информации, незаконски дојави и позиции во кои корисникот може директно да влијае врз исходот. Самата промена на правилата е индиректно признание дека сомнежите веќе не можат да се оттурнат како обична интернет-шпекулација. Кога платформа што заработува од предвидување почнува вонредно да ги стега правилата по серија „премногу точни“ облози, тогаш веста повеќе не е кој добил милион, туку дали војната, дипломатијата и финансискиот интерес веќе се споиле во ист непрегледен пазар.