Поранешниот шеф на Гугл го предупредува светот: Загрижен сум за новото „сценарио на Бин Ладен“, владите мора веднаш да го направат ОВА

Поранешниот извршен директор на Google, Ерик Шмит, е загрижен за можноста вештачката интелигенција да биде злоупотребена од „земјите кои претставуваат сериозна закана“, како што се Северна Кореја, Иран или Русија, бидејќи би можеле да работат на биолошко оружје што може да предизвика сериозна штета. 

„Мојата загриженост во врска со вештаќката интелигенција не е за она за што повеќето луѓе зборуваат, јас говорам за екстремните ризици“, изјави тој за Би-Би-Си. 

Милијардерот, кој беше на чело на Google од 2001 до 2017 година, ја нагласи потребата од владин надзор над приватните технолошки компании кои развиваат модели на вештачка интелигенција, но предупреди дека прекумерната регулација може да ја забави иновативноста. Тој, исто така, изрази поддршка за американските извозни контроли на моќни микрочипови кои ги напојуваат најнапредните системи за вештачка интелигенција. 

Пред да ја напушти функцијата, поранешниот американски претседател Бајден го ограничи извозот на микрочипови во сите земји освен во 18 земји, со цел да го забави напредокот на ривалските земји во истражувањето на вештачката интелигенција. 

„Оваа технологија е доволно брза што земјите како Северна Кореја, Иран или дури и Русија би можеле да ја усвојат и да ја злоупотребат за свои цели“, рече Шмит. 

Тој укажа на потенцијалната опасност од создавање „биолошки напад од злонамерни актери“ преку системи за вештачка интелигенција во погрешни раце. 

„Секогаш сум загрижен за „сценариото на Бин Ладен“, каде што некоја навистина злобна личност презема дел од нашиот модерен живот и го користи за да им наштети на невини луѓе“, рече тој, потсетувајќи се на Осама бин Ладен, кој ги организираше нападите на 11 септември 2001 година, за време на кои киднапираните авиони беа користени за убивање на илјадници луѓе на американска територија. 

Шмит повика на рамнотежа помеѓу владиниот надзор на развојот на вештачката интелигенција и избегнувањето на прекумерно регулирање на секторот. 

„Вистината е дека вештачката интелигенција и иднината во голема мера ќе бидат изградени од приватни компании“, рече тој. „Навистина е важно владите да разберат што правиме и да не следат. 

Тој нагласи дека не е против надзорот, туку се противи на идејата приватните компании да работат без никаков надзор. Шмит зборуваше од Париз, каде што се одржа Самитот за акција за вештачка интелигенција, на кој САД и Велика Британија одбија да потпишат договор за регулирање на вештачката интелигенција. 

Американскиот потпретседател Венс рече дека регулативата „ќе ја убие трансформативната индустрија исто како што почнува да се развива“. 

Шмит предупреди дека прекумерната регулатива во Европа може да ја забави револуцијата на вештачката интелигенција, за која рече дека е најважната револуција од откривањето на електричната енергија. Тој, исто така, истакна дека големите технолошки компании „не го разбираа“ потенцијалот што го имаше вештачката интелигенција пред 15 години, но сега го разбираат. 

„Моето искуство со технолошките лидери е дека тие навистина го разбираат влијанието што го имаат, но тие можат да донесат различни вредносни проценки отколку што би правела владата“, заклучи Шмит.