Летата стануваат потопли, европските градови се прегреваат: Потребни се дополнителни мерки за ублажување на ефектите од топлотните бранови

Извештајот на консултантската куќа за архитектура и инженерство „Sweco “ покажува дека на европските градови итно им е потребна помош и дополнителни мерки за ублажување на ефектите од топлотните бранови, бидејќи континентот станува потопол. Во извештајот, исто така, се наведува дека температурите на Стариот континент растат двојно побрзо од светскиот просек.

Кои се мерките што треба да се преземат?

Тие мерки треба да вклучуваат дигитални иновации, решенија базирани на природата, сино-зелена инфраструктура и високо-перформансни згради, тврди „Sweco“.

Бидејќи минатата и предминатата година имаше рекорден број денови со екстремна топлина, „Sweco “ предупредува дека смртните случаи од ефектите на екстремната топлина во Европа се зголемиле за околу 30% во последните 20 години.

Топлотните бранови, покрај ризиците по јавното здравје, негативно влијаат и на инфраструктурата и економската продуктивност во урбаните средини, се наведува во документот.

Извештајот, кој ја анализираше ситуацијата во 24 европски градови, покажува дека ризиците поврзани со топлината често се занемаруваат во климатските планови и дека градовите во северна Европа се дизајнирани да го заштитат населението од студ, а не од топлина.

Анализата, исто така, покажува колку зголемување на температурата се очекува во секој од градовите во периодот од 2020 до 2100 година.

Проектираното зголемување на бројот на екстремно топли денови за Копенхаген е 160%, во споредба со 150% за Стокхолм, 140% за Осло и 130% за Ротердам и Брисел. Во Хелсинки, се очекува бројот на такви денови да се удвои.

Иако извештајот покажува дека некои европски градови преземаат чекори во вистинската насока, се забележува дека сè уште постојат големи празнини на кои треба да се одговори. Во своите климатски планови, европските градови треба да се фокусираат повеќе на заштитата на ранливите групи, преку подобрување на системите за ладење на објектите како што се предучилишните установи или домовите за стари лица.

Оваа фирма препорачува подобро мапирање на слабите точки во градовите и дизајнирање решенија на ниво на згради и населби за прилагодување на урбаните простори.

Ова може да се постигне со спроведување повеќе решенија базирани на природата, развивање сино-зелена инфраструктура и ажурирање на регулативите за нови и постојни згради.

Извештајот, исто така, препорачува градовите да работат заедно за ефикасно справување со топлотните бранови. Потребни се инвестиции во знаење, користење на релевантни податоци и заедничко планирање за справување со кризи предизвикани од топлотни бранови.

Властите мора да создадат поефикасни стратегии за заштита на ранливите групи, зачувување на општото јавно здравје и зголемување на климатската еднаквост.

Sweco истакнува дека средствата се достапни, со оглед на тоа што 680 милијарди евра од буџетот на Европската Унија се наменети за мерки поврзани со климата за периодот 2021-2027 година.