Потврдени резултатите од парламентарните избори во Косово: Патот до формирање влада е отворен

Претседателот на ЦИК, Крешник Радониќи, изјави дека резултатите не се разликуваат од оние на денот на објавувањето.

Според конечните резултати, Движењето Самоопределување излезе како победник на овие избори со 51,10 проценти од гласовите, Демократската партија на Косово (ПДК) го освои второто место со 20,19 проценти, додека Демократскиот сојуз на Косово (ЛДК) беше трет со 13,24 проценти од гласовите.

Алијансата за иднината на Косово (ААК) обезбеди 5,50 проценти од гласовите, додека партијата Српска листа доби 4,49 проценти.

Со потврдувањето на резултатите, се отвора патот за понатамошни институционални чекори кон конституирање на ново свикување на Собранието на Косово, а потоа и формирање на нова влада.

По формирањето на Собранието и владата, се очекуваат дискусии за прашањето за претседателот. Вршителот на должноста премиер на Косово, Албин Курти, изјави дека ќе има разговори со поранешните опозициски партии со цел да се добие поддршка за уште еден мандат за претседателката Вјоса Османи, чиј мандат истекува во април.