Skip to content
Подготовките за претстојните велигденски празници вообичаено започнуваат со набавка на поголеми количини јајца, но токму во овој период зголемената побарувачка на пазарот може да доведе до продажба на производи со сомнителен квалитет или изминат рок.
Конзумирањето на расипани јајца претставува сериозен ризик по здравјето, па затоа е неопходно граѓаните да знаат како брзо и едноставно да ја утврдат свежината пред да започнат со вапсањето. Постојат три основни методи кои не бараат посебна опрема, а даваат сигурни резултати во домашни услови.
Најпознатиот тест е со потопување во длабок сад со ладна вода: свежото јајце веднаш паѓа на дното и останува легнато на страна, додека расипаното испливува на површина поради насобраните гасови во внатрешноста.
Вториот начин е со нежно протресување до увото – кај свежите јајца не се слуша никаков звук, додека кај старите се чувствува карактеристично „прскање“ бидејќи воздушната перница е зголемена, а белката е течна.
Третиот метод е проверка по кршењето; кај свежото јајце жолчката е испапчена и цврста, а белката густа и леплива. Доколку по кршењето жолчката веднаш се разлева, а белката е воденикава, тоа е јасен знак дека производот не е безбеден за употреба.