Премиерот на Република Српска Саво Миниќ поднесе оставка

Премиерот на Република Српска, Саво Миниќ, денеска поднесе оставка, а на прес-конференција изјави дека повторно ќе биде предложен за мандатар. Миниќ рече дека за потегот се консултирал со претседателот на Република Српска, Синиша Каран, и дека зад него стои мнозинството во Народното собрание на ентитетот.

Според неговата изјава, оставката ја поднесува за да се обезбедат, како што наведе, „легалност и легитимитет“ на Владата. Тој притоа спомена и забелешки од меѓународната заедница, без дополнително да прецизира на што конкретно мисли.

Ова е вторпат во последните неколку месеци Миниќ да поднесе оставка и да најави дека повторно ќе биде избран. Тој беше именуван за премиер на 2 септември минатата година, а неговата влада подоцна беше оспорена поради начинот на кој бил предложен мандатарот. Уставниот суд на Босна и Херцеговина на 23 јануари оцени дека владата не е уставна, бидејќи Милорад Додик тогаш го предложил Миниќ иако повеќе немал право да ја врши таа политичка функција.

Во претходната постапка, по оставката на Миниќ, за мандатар беше предложена тогашната заменик-претседателка Ана Тришиќ Бабиќ, по што тој повторно беше вратен на позицијата. Подоцна беше побарана и оценка на уставноста на нејзиното назначување, но Уставниот суд на Република Српска во февруари ја суспендираше таа постапка.

Оставката на Миниќ доаѓа во момент кога политичката и институционалната криза во Република Српска и натаму се прелева врз легитимитетот на владините одлуки и врз внатрешните односи во Босна и Херцеговина.