Skip to content
Републиканците во Претставничкиот дом на американскиот Конгрес ќе се обидат да изберат претседател со цел да го прекинат тринеделниот вакуум што го парализираше Домот и го спречи Конгресот да ги реши итните барања.
Претставничкиот дом на Конгресот е без претседател од 3 октомври. За таа функција се кандидираа осум кандидати, но не се знае дали некој од нив ќе успее да ја обедини партијата.
По три недели внатрешни спорови, дел од републиканците веруваат дека наскоро би можел да биде избран нов претседател на Претставничкиот дом.
– Луѓето се толку обесхрабрени од она што се случува во последните три недели што сакаат да се обединат, изјави вчера Дон Бејкон. Тој им рече на новинарите дека се надева оти Претставничкиот дом би можел да има претседател до вторник навечер.
Меѓу кандидатите е и пратеникот Том Емер, треторангираниот републиканец во Претставничкиот дом и човек со доволно искуство во политиката и собирање средства за кампања за да биде силен кандидат за таа функција.
Републиканците веќе одбија двајца кандидати кои ги имаа тие вештини.
Кевин Мекарти беше соборен од функцијата претседател на Претставничкиот дом од мала група републикански бунтовници на 3 октомври, а вториот по ранг републиканец, Стив Скализ, се откажа една недела подоцна, откако не успеа да собере доволно гласови.
Том Емер има седум ривали од десното крило на партијата, вклучувајќи ги Бајрон Доналдс и Кевин Херн.
Републиканците минатата недела веќе го отфрлија најистакнатиот член на таа фракција, Џим Џордан.
Поради таа ситуација, Претставничкиот дом не може да одговори на барањето на претседателот Џо Бајден да одобри 106 милијарди долари за помош за Израел и Украина и за безбедноста на американските граници.
Конгресот треба да проработи до 17 ноември, кога истекува рокот за договор за финансирање на американската влада.
Републиканците го контролираат Претставничкиот дом 221 спрема 212, што значи дека можат да си дозволат само четири „пребегнувања“.
