Приватен авион се урна при полетување во САД, осум лица биле во леталото

Приватен авион се урна при полетување од меѓународниот аеродром „Бангор“ во сојузната држава Мејн, во услови на силна зимска бура што во неделата вечерта го зафати североистокот на САД и предизвика сериозни нарушувања во воздушниот сообраќај.

Инцидентот, според федералните воздухопловни власти, се случил околу 19:45 часот по локално време, кога деловен авион од серијата Bombardier Challenger се обидувал да полета. Во леталото имало осум лица, а веднаш по несреќата на пистата избувнал пожар, по што на терен излегле противпожарни и спасувачки екипи. До моментот на првичните информации, властите не соопштија детали за идентитетот и здравствената состојба на патниците и екипажот.

Аеродромот привремено бил затворен поради интервенцијата и обезбедувањето на местото на настанот, додека дел од летовите биле пренасочени или откажани. Несреќата се случи во период кога голем дел од источниот брег беше под зимски предупредувања за снег, лапавица и мраз, а повеќе американски медиуми објавија дека невремето довело до илјадници откажани и одложени летови низ земјата.

Федералната администрација за авијација и Националниот одбор за безбедност во сообраќајот најавија истрага за причините за падот, при што ќе се анализираат временските услови, состојбата на пистата и техничките параметри на леталото во моментот на полетувањето.