Прогласена вонредна состојба во Венецуела

Венецуелската влада соопшти дека „ја отфрла и осудува“ американската „воена агресија“.

Владата во Каракас ги обвини САД дека се обидуваат да ги „запленат стратешките ресурси на Венецуела, особено нејзината нафта и минерали, во обид насилно да ја уништат политичката независност на нацијата“.

„Таквата агресија го загрозува меѓународниот мир и стабилност, особено во Латинска Америка и Карибите, и сериозно ги загрозува животите на милиони луѓе“, се додава во соопштението, пренесува Индекс .

Претседателот Николас Мадуро прогласи „состојба на надворешна закана на целата национална територија, со цел да се заштитат правата на населението, целосното функционирање на републиканските институции и веднаш да се прибегне кон вооружена борба“.

„Целата земја мора да се мобилизира за да ја победи оваа империјалистичка агресија“, се вели во соопштението.

Новинската агенција „Асошиејтед Прес“ објави дека во Каракас се слушнале најмалку седум експлозии и звук на авиони што летаат ниско.