Skip to content
Рускиот претседател Владимир Путин денеска телефонски го информирал својот палестински колега Махмуд Абас за чекорите што Москва ги презема за да помогне во деескалацијата на конфликтот во Газа и да обезбеди непречена испорака на хуманитарна помош до оние на кои им е потребна.
Кремљ соопшти дека Путин ветил дека Русија ќе продолжи да испорачува хуманитарна помош до опколената енклава, вклучувајќи лекови и медицинска опрема.
„Нагласена е важноста од што поскоро прекинување на крвопролевањето и продолжување на политичкиот процес за блискоисточното решение на општо признатата меѓународна правна основа, која предвидува формирање на државата Палестина во границите од 1967 година. Во овој контекст Руската страна изрази поддршка за напорите на палестинското раководство предводено од Махмуд Абас“, се наведува во соопштението.
Путин и Абас ја изразија својата заедничка намера за дополнително зајакнување на пријателските руско-палестински односи.
Путин рече дека останува повикот до Абас да ја посети Русија останува на сила, што може да се реализира во заемно прифатлив момент.
Израел го нападна Појасот Газа по нападот на Хамас на 7 октомври, а во нападите загинаа најмалку 20.057 Палестинци, главно жени и деца, а беа ранети 53.320 луѓе.
