Skip to content
Рускиот претседател Владимир Путин, следната недела нема да патува на самитот на БРИКС во Бразил поради важечката потерница за него од Меѓународниот кривичен суд (МКС), изјави помошникот за надворешна политика на Кремљ, Јуриј Ушаков.
МКС го издаде налогот за апсење во 2023 година, нешто повеќе од една година откако Русија започна тотална војна против Украина, обвинувајќи го Путин за воен злостор за депортација на стотици деца од Украина.
Русија ги отфрла обвинувањата за воени злосторства, а Кремљ, кој не го потпиша основачкиот договор на МКС, ја прогласи наредбата за ништовна. Но, тоа значи дека Путин мора да го процени ризикот од евентуално апсење ако патува во една од земјите потписнички на статутот на МКС.
Да се потсетиме дека во 2023 година, Путин одлучи да не патува во една таква земја, Република Јужна Африка, за самитот на БРИКС. Но, минатата година тој беше пречекан со црвен тепих во Монголија, иако таа земја е исто така членка на МКС.
Ушаков рече дека Путин ќе присуствува на самитот на БРИКС во Бразил на 6 и 7 јули преку видео врска.
„Ова се должи на одредени тешкотии во контекст на барањето на МКС. Во овој контекст, бразилската влада не можеше да заземе јасен став што би му дозволил на нашиот претседател да учествува на овој состанок“, рече Ушаков.
Рускиот министер за надворешни работи Сергеј Лавров ќе патува на самитот како претставник на Русија. Според извештаите на медиумите, кинескиот претседател Си Џинпинг исто така ќе го пропушти самитот.
