Skip to content
Албанскиот премиер Еди Рама, во пресрет на Самитот на НАТО во Вилнус, Литванија, оценува дека тој е од клучно значење, најавувајќи дека на него ќе ја потврди цврстата посветеност на Албанија кон НАТО и оти неговата земја е подготвена да ангажира дополнителни трупи.
-Со нетрпение го очекуваме клучниот самит на НАТО во Вилнус. Во Вилнус ќе ја потврдиме цврстата посветеност на Албанија кон НАТО, безбедноста на нашите сојузници на источното крило, праведната борба на украинскиот народ и самата потреба за стабилност и фокус на Западен Балкан, напиша премиерот во објавата на Твитер.
Рама посочува дека Албанија ги зголемила трошоците за одбрана во последната деценија од 1,35 отсто на 1,76 отсто од Бруто домашниот производ и додаде дека до 2024 година целта е да се достигне 2 отсто.
-Во последната деценија Албанија ги зголеми трошоците за одбрана од 1,35 отсто на 1,76 отсто од нашиот БДП. Меѓутоа, во вакви моменти е потребно повеќе. Затоа, го задолжив Министерството за одбрана да ја достигне целта од 2 отсто до 2024 година. Иако не сме меѓу богатите членки на НАТО, веруваме дека целта од 2 отсто е подот, а не плафонот на нашата посветеност, наведува тој.
Најави дека во Вилнус, Албанија ќе ја покаже својата подготвеност да се ангажира понатаму.
-Исто така, ќе објавиме дека, доколку е потребно, Албанија е подготвена да ангажира дополнителни трупи за зајакнување на присуството на НАТО. Заедно сме посилни и само заедно можеме да надвладееме во овој многу дефинирачки момент за она во што веруваме, за доброто на генерациите што доаѓаат, заклучува албанскиот премиер Рама во објава на Твитер.
Албанија е членка на НАТО од 2009 година. (МИА)
