Рамафоса пред самитот на Г20: Ниту една земја нема право да малтретира друга земја

Ниту една земја нема право да малтретира друга земја, изјави денеска јужноафриканскиот претседател Сирил Рамафоса, алудирајќи на бојкотот на САД на самитот на Г20 што овој викенд го организира Јужна Африка.

Во дипломатска нота од 15 ноември, Вашингтон го наведе своето отсуство од самитот како начин да ѝ се одземе на Преторија можноста да издаде заедничка изјава по состанокот, на кој се собираат најголемите светски економии.

„Неприфатливо е една земја, врз основа на нејзината географска локација, приход или војска, да одредува кој има глас, а кој не“, рече Рамафоса на настан на кој се собраа организациите на граѓанското општество пред самитот закажан за сабота и недела.

„Тоа едноставно значи дека една нација не треба да малтретира друга“, додаде јужноафриканскиот претседател.

Откако се врати во Белата куќа во јануари, американскиот претседател Доналд Трамп започна серија остри напади врз владата во Преторија, наведувајќи го наводниот прогон на белото малцинство и наметнувањето на царина од 30 проценти. Во нота до јужноафриканските дипломати, амбасадата на САД потврди дека на самитот не присуствувал ниту еден претставник на САД.

„Приоритетите на Јужна Африка за Г20 се спротивни на политичките позиции на САД и не можеме да поддржиме консензус за документите договорени за време на вашето претседателство“, се вели во нотата.

Доколку исходот од самитот биде објавен „за време на вашето претседателство, тој ќе биде претставен исклучиво како изјава од (јужноафриканскиот) претседател за точно да се одрази недостатокот на консензус“, додаде амбасадата на САД.

Министерот за надворешни работи на Јужна Африка, Роналд Ламола, рече дека Преторија ќе продолжи со напорите за добивање заедничка изјава од присутните лидери.

„Нема да дозволиме ниту една страна што е отсутна (од самитот) да ни каже дека не можеме да усвоиме изјава или да донесуваме одлуки на самитот“, рече Ламола по обраќањето на претседателот Рамафоса.

Темата на јужноафриканското претседателство, „Солидарност, еднаквост, одржливост“, се фокусира првенствено на олеснување на долгот за земјите во развој, финансирање на адаптацијата кон климатските промени и борба против економската нееднаквост.

Државниот секретар на САД, Марко Рубио, во февруари ја нарече темата „антиамериканска“.

Јужна Африка е првата африканска земја домаќин на самитот на Г20, чии членки – 19 земји, Европската унија и Африканската унија – претставуваат 85 проценти од светскиот бруто домашен производ (БДП) и околу две третини од светската популација.