Разбиена сириска мрежа: Парите од дрога ги претворале во златни прачки кои биле транспортирани  и во Косово и во Македонија

Разбиена е сириска мрежа која парите од дрога ги претворале во златни прачки кои биле транспортирани во различни земји, вклучително и во Косово и во Северна Македонија, објавија албанските медиуми повикувајќи се на РЕЛ.

Италијанската полиција уапси пет лица во северните региони Пиемонт и Ломбардија и запленила 17 милиони евра.

Истрагата ја спровел заеднички тим, вклучувајќи ја и даночната полиција на Италија и француската жандармерија во Марсеј, а напорите беа координирани од страна на италијанската национална дирекција против мафијата и обвинителството во Марсеј, заедно со Европравда и Европол, наведуваат медиумите. 

Според обвинителите во текот на повеќе од шест месеци, осомничените „заработиле” повеќе од 17 милиони евра од дрога, главно во Франција, и ги транспортирале парите во возила до област во близина на Пиемонт во Италија, која граничи со Франција.

„Таму, во соработка со три топилници за скапоцени метали во Пиемонт и Ломбардија, парите биле претворени во златни прачки со иста парична вредност. Златото потоа било транспортирано во Косово, Северна Македонија, Турција и Мароко, се наведува во соопштението.

Се посочува дека ова е првпат истражителите да успеат да го реконструираат протокот на пари од дрога, генерирани во странство, кои потоа биле претворени во злато – имот што полесно се транспортира.

Обвинителите велат дека идентификувале широка мрежа на сириски државјани вклучени во процесот.

Тие посочуваат дека француската жандармерија, исто така, извршила „апсења на други осомничени лица вмешани во собирање приходи од дрога во Франција”.