Ризикувате мозочен удар кога одите од клима па надвор на топло

Во услови на жешки бранови и температури до 39°C, многумина спасот го бараат во клима уредите. Но, лекарите предупредуваат – наглиот излез од премногу разладена просторија на врелата улична жештина може да биде опасен по живот. Разликата во температурите може да предизвика шок за организмот, што ја зголемува шансата за топлотен или мозочен удар.

Институтот за јавно здравје препорачува собната температура да не биде „арктички“ студена, туку околу 25°C. Во најтоплиот дел од денот, од 11 до 17 часот, прозорците и завесите треба да бидат затворени, а ладењето да биде умерено.

Од Министерството за здравство апелираат да се избегнува престој на отворено во пеколот од сонце, особено за деца, стари лица и хронично болни. Потребно е редовно внесување течности, носење лесна и светла облека, и задолжителна заштита за глава и очи.

Летото може да биде убаво, но и опасно – особено кога сами го предизвикуваме шокот врз телото. Клима уредите нека бидат пријатели, а не тивок ризик за здравјето.