Skip to content
Државниот секретар на САД, Марко Рубио, вчера се сретна со британскиот министер за надворешни работи, Дејвид Лами, и имаше одделни телефонски разговори со австралиската министерка за надворешни работи, Пени Вонг, францускиот министер за надворешни работи, Жан-Ноел Баро и италијанскиот министер за надворешни работи, Антонио Тајани, за да разговараат за војната меѓу американскиот сојузник Израел и регионалниот непријател Иран.
Стејт департментот соопшти дека Рубио и министрите за надворешни работи се согласиле дека „Иран не смее да развива или да стекнува нуклеарно оружје“.
Лами го кажа истото на платформата X, додавајќи дека ситуацијата на Блискиот Исток останува опасна и дека постои можност за постигнување дипломатско решение во следните две недели.
Размената на воздушни напади меѓу Иран и Израел, која започна на 13 април со израелски напад врз Иран, предизвика тревога во регионот кој веќе е затегнат од воената операција на Израел во Појасот Газа во октомври 2023 година.
Претседателот на САД, Доналд Трамп, ќе одлучи во следните две недели дали САД ќе се приклучат на војната, соопшти вчера Белата куќа. Трамп го држи светот во неизвесност за своите планови, оддалечувајќи се од брзото дипломатско решение кое првично беше предложено, кон сугестијата дека Вашингтон би можел да се придружи на борбите на страната на Израел.
Белата куќа вчера соопшти дека Трамп ќе присуствува на состанок за национална безбедност утрово.
Израел, единствената земја на Блискиот Исток за која се верува дека има нуклеарно оружје, изјави дека нападите врз Иран имале за цел да го спречат Техеран да развие нуклеарна бомба. Иран, кој вели дека неговата нуклеарна програма е целосно мирна, одговори на нападот со воздушни напади врз Израел.
Иран е страна во Договорот за неширење на нуклеарно оружје (НПТ), додека Израел не е.
Според новинската агенција на активисти за човекови права (ХРАНА), израелските воздушни напади во Иран убиле 639 лица. Израел објави дека најмалку 24 израелски цивили се убиени во ирански напади.
Се очекува министрите за надворешни работи на Велика Британија, Франција, Германија и Европската Унија денеска да се сретнат со министерот за надворешни работи на Иран во Женева во обид да го смират конфликтот.
