Русија обновува воени бази во близина на границата со Финска

започна со обнова на долго напуштен воен гарнизон од советската ера во близина на границата со Финска, нова членка на НАТО алијансата. Гарнизонот „Рибка“, сместен во северозападниот руски град Петрозаводск, на околу 160 километри од финската територија, беше во голема мера напуштен од 1990-тите.

Сепак, сателитските снимки покажуваат драматични промени на локацијата од летото 2024 година. Обрасната и дотраена шумска површина е исчистена, а снимките од октомври 2025 година откриваат нова отворена површина со повеќе од 50 воени возила. Овој развој на настаните доаѓа во услови на стравувања на Западот дека поразот на Украина би можел да го отвори патот за руска агресија врз источниот крило на НАТО, вклучително и Финска, објавува „Киев пост“ .

Во 2024 година, Русија го формираше 44-от армиски корпус во северозападната Република Карелија, чиј главен град е Петрозаводск. Иако се планирани 15.000 војници за корпусот, досега мал број од нив пристигнале во областа, бидејќи повеќето од нив се распоредени во Украина. Сепак, ако плановите на Москва се остварат, на корпусот ќе му требаат сместување и полигони за обука, поради што Москва наводно се свртува кон обнова на гарнизонот од советската ера во Карелија.

Финскиот воен експерт Марко Еклунд изјави за финската телевизија YLE дека возилата собрани во гарнизонот Рибка укажуваат на формирање на оклопна бригада која треба да обезбеди транспорт за новиот армиски корпус. „Гарнизонот во Рибка не е доволен за целиот армиски корпус“, рече Еклунд, додавајќи дека „затоа се очекуваат многу големи градежни проекти во Карелија“

Република Карелија моментално има помеѓу 2.500 и 3.000 војници, од кои повеќето служат во воздухопловните сили, објави YLE. Воздухопловната база на аеродромот во Петрозаводск има 80 борбени авиони, вклучувајќи и напредни ловци Су-35С. Локалното складиште за опрема содржи и околу 2.000 тенкови, возила и артилериски системи, претежно од советската ера. Полкот за радиотехника управува со десетина радарски станици од своето седиште во Петрозаводск.

Сепак, изградбата на гарнизонот е многу понапредна подалеку на север, во градот Кандалакша, кој се наоѓа веднаш под Арктичкиот круг. Минатиот јуни, YLE откри дека се во тек работи на гарнизонот Лупче-Савино, наменет за сместување на артилериска и инженерска бригада.

Сателитските снимки покажуваат дека од мај, неколку згради се подигнати од темел до покрив, а дополнителни згради се во изградба. Русија, исто така, ги зајакнува своите сили појужно, во регионот Луга. Според Еклунд, моторизираната пешадиска бригада стационирана таму пред војната била претворена во дивизија, со што нејзината сила се зголемила за трипати на околу 10.000 луѓе.