Руски ракети погодија полигон за обука во Украина, неколку мртви

Две руски ракети утрово погодија полигон за обука во Украина, предизвикувајќи жртви, соопшти Јужната оперативна команда на украинските сили. Точната локација и бројот на жртви сè уште не се објавени, објавуваат украинските медиуми.

Командата соопшти дека базата се наоѓала „во задниот и релативно мирен дел“ на Украина. Потврди дека, и покрај преземените мерки на претпазливост, жртвите не можеле целосно да се избегнат.

-Поради непријателскиот оган, и покрај тревогата, преместувањето во засолништа и другите преземени безбедносни мерки, не беше можно целосно да се избегнат жртви. Надлежните служби за итни случаи работат на терен, се вели во соопштението. Додадено е дека „на повредените итно им е пружена целата потребна медицинска помош“.

Воената служба за спроведување на законот започна внатрешна истрага за инцидентот за да ги утврди сите околности на нападот.

Нападот се случил за време на „масовен комбиниран напад врз Украина“. Украинските воздухопловни сили објавија дека откриле 37 ракети, вклучувајќи 28 балистички ракети, и 320 дронови преку ноќ. Нападите беа претежно насочени кон украинските енергетски објекти, предизвикувајќи прекини во електричната енергија низ целата земја. Официјалните лица потврдија дека постројките за производство на гас во регионот Полтава биле затворени по нападите. Руските напади го преполовија производството на гас во Украина во последните месеци.