Skip to content
Прашањето за мигрантите повторно го турка политичкиот конфликт на релација влада–опозиција, а СДСМ настојува дебатата да ја врати од локално на државно ниво. Со ново соопштение партијата порача дека единствено Собранието, како највисок орган избран директно од граѓаните, може да донесе одлука дали Македонија ќе прифаќа мигранти за пари, а не советите во општините.
Од СДСМ потсетуваат дека премиерот Христијан Мицкоски со денови избегнува јасно да одговори дали ќе ја потпише предложената резолуција со која, според нив, на граѓаните би им се гарантирало дека во државата нема да има прифаќање мигранти во замена за финансиски договори со други земји. Наместо таков одговор, како што наведуваат, од Владата секојдневно стигнуваат „нови изговори и спинови“ околу темата.
Во фокусот на критиката е најавата на Мицкоски дека советниците на ВМРО-ДПМНЕ во повеќе општини ќе покренат иницијативи за усвојување документи со кои локално ќе се забрани изградба мигрантски кампови. За СДСМ, ова е обид чувствителното прашање да се префрли од државно на локално ниво и да се замени институционален договор со партиски декларации по општини. „Собранието е над општините и може да спречи прифаќање мигранти на целата територија на Македонија“, порачуваат од партијата, додавајќи со иронија дека „добро е што премиерот барем не најавил документи на ниво на месни заедници“.
Социјалдемократите ја претставуваат резолуцијата како „народен договор“, бидејќи пратениците во Собранието се избрани директно од граѓаните и ја имаат, како што нагласуваат, единствената демократска легитимација да донесат обврзувачка одлука за вакво прашање. Оттаму уште еднаш го повикуваат Мицкоски да се изјасни јасно – дали ќе ја потпише резолуцијата или не, со порака дека одговорот не им се должи на СДСМ, туку на граѓаните.
Контекстот на ова ново соопштение е ескалираната расправија околу наводните договори за прием на мигранти од Велика Британија. Опозицискиот лидер Венко Филипче претходните денови најави резолуција за „одбрана на Македонија од мигрантите“ и соопшти дека опозициските партии се обединуваат против, како што тврди, тајните ангажмани на Владата во пакет со кредитни договори. Од другата страна, премиерот Мицкоски возврати дека мигрантски кампови нема да има и дека СДСМ „свесно шири страв и паника“, па најави токму локални иницијативи во општинските совети како гаранција дека на нивните територии нема да се градат кампови.