СДСМ: Зад посетата на Орбан стојат прашања што Мицкоски ги избегнува

Посетата на Орбан, според СДСМ, отвора прашања што Христијан Мицкоски ги избегнува, во момент кога, како што наведува партијата, политичката сцена во Унгарија се менува, а поддршката за Виктор Орбан драматично опаѓа. Во соопштението се тврди дека Мицкоски останува на политики на изолација, корупција и, како што наведуваат од СДСМ, одработување за туѓи интереси.

СДСМ во соопштението го опишува Орбан како симбол на политика што Европската Унија, според нив, веќе не ја толерира. Партијата тврди дека станува збор за коруптивна политика што служи на бизнис и руски интереси, наместо на европските вредности и на иднината на граѓаните.

Во истиот текст се наведува дека, додека граѓаните на Унгарија го избираат европскиот пат, Мицкоски ја турка Македонија во спротивна насока, кон изолација, неизвесност и назадување што, според СДСМ, треба да трае со децении. Партијата тврди и дека Мицкоски ги продава македонските национални интереси и дека посетата на Орбан е искористена за договарање на враќањето на Никола Груевски.

СДСМ во соопштението отвора и дополнителни прашања за тоа какви други договори се прават зад затворени врати, што ќе се случи со, како што наведуваат, 40 проценти од медиумите во Македонија кои ги контролира ВМРО кога ќе падне Орбан, како и што ќе биде со бизнисите на Орбан во Македонија во енергетиката и телекомуникациите.