Skip to content
Режимот „инкогнито“ или „приватно прелистување“ не значи анонимност на интернет, туку само ограничување на податоците што прелистувачот ги чува локално на уредот. Google во објаснувањето за Chrome наведува дека во инкогнито режимот се ограничува она што се зачувува на уредот, но активноста и натаму може да биде видлива за веб-страниците што ги посетувате, за вашиот интернет-провајдер, за училиштата или работодавачите и за услугите што ги користите.
И Mozilla јасно наведува дека приватното прелистување не го маскира идентитетот на корисникот на интернет. Во објаснувањето на Firefox стои дека приватниот режим не ве прави анонимни за веб-страниците, пребарувачите, интернет-провајдерот или работодавачот, туку главно спречува локално зачувување историја, колачиња и други податоци по завршување на сесијата.
Тоа значи дека инкогнито режимот најмногу служи кога корисникот не сака по него на истиот уред да остане историја на прелистување, зачувани форми или колачиња. Не значи дека корисникот исчезнува од мрежата, ниту дека автоматски е заштитен од следење, профилирање или надзор над интернет-сообраќајот.
Кога станува збор за анонимно прелистување, Тор останува најчесто спомнуваната алатка. Tor Project наведува дека Tor го насочува сообраќајот низ различни сервери и го шифрира во слоеви, така што ниту една поединечна точка не може лесно да открие и кој сте и што правите на интернет. Од Privacy Guides, пак, наведуваат дека за анонимно прелистување треба да се користи Tor, додека за стандардно, но поприватно прелистување препорачуваат прелистувачи со посилни заштити од следење.
Корисниците што сурфаат „инкогнито“ често имаат погрешна претстава за тоа што навистина добиваат од овој режим. Во текстот се наведува дека Chrome е особено критикуван, а како подобри алтернативи се спомнуваат Tor, Brave и Firefox, повикувајќи се на ставови од Privacy Guides.