Skip to content
Американскиот сенатор Берни Сандерс упати строго предупредување до американскиот претседател Џозеф Бајден да биде поагресивен во решавањето на грижите на милиони гласачи кои се борат да преживеат или ќе ризикува во Белата куќа да се врати, како што рече, антидемократскиот демагог Доналд Трамп.
Во интервју за „Гардијан“ од неговата база во Бурлингтон, Вермонт, Сандерс го повика Бајден повеќе да се вклучи во неговата кандидатура за реизбор.
Тој рече дека неговиот републикански ривал ќе победи ако претседателот не биде подиректен во препознавањето на бројните кризи со кои се соочуваат семејствата од работничката класа.
„Мораме да видиме како Белата куќа се ангажира поагресивно на прашањата во врска со здравствената заштита, домувањето, даночните реформи, високите цени на лековите“, рече Сандерс.
„Ако го натераме претседателот да тргне во таа насока, тој ќе победи, ако не, ќе загуби“, посочи Сандерс.
Американскиот сенатор од Вермонт додаде дека е во контакт со Белата куќа и дека инсистира на овие работи.
„Се надеваме дека јасно ќе му ставиме до знаење на претседателот и на неговиот тим дека нема да победат на овие избори доколку не излезат со прогресивна агенда што ги задоволува потребите на работничката класа на оваа земја“, порача Сандерс.
