Skip to content
Фотографијата на овој редок рис со леуцизам (генетска состојба што предизвикува делумен или целосен недостаток на пигмент во кожата, но не и во очите, како кај албиносите) го привлече вниманието на научната јавност низ целиот свет.
Овој „бел дух на медитеранската шума“, како што го опишува фотографот, го снимил шпанскиот љубител на природата Анхел Идалго. Тој го забележал животното на снимките од неговите фото-замки, поставени длабоко во планините на покраината Хаен, на југот на Шпанија.
Според локалниот медиум Ahora Jaén, оваа досега невидена појава е регистрирана на 22 октомври 2025 година, а точната локација се чува во тајност за да се заштити рисот од ловокрадци. На снимките јасно се гледа дека животното нема трагачка огрлица, што значи дека е дива единка.
Иберијскиот рис (Lynx pardinus) е ендемичен вид на Иберискиот Полуостров и се смета за клучен предатор во медитеранскиот екосистем, бидејќи со регулирањето на популацијата на зајаци – неговата главна храна – го одржува природниот баланс. Неговото исчезнување би предизвикало пренамножување на други животни и сериозен дисбаланс во природата.
И покрај огромните напори на шпанските и португалските власти, овој вид и понатаму се води како „ранлив“ според Меѓународната унија за заштита на природата (IUCN). Сепак, резултатите од програмите за заштита се охрабрувачки – според шпанското Министерство за еколошка транзиција, популацијата на рисот во 2023 година ја надминала бројката од 2.000 единки на Иберискиот Полуостров.
Благодарение на проектите за репопулација што започнаа во 2011 година, кога видот беше на работ на истребување, рисовите денес повторно живеат во области како Сиера Морена, Монтес де Толедо, басенот на реката Гвадијана и Доњана, но и на нови локации кои до неодамна беа незамисливи – како Сиера Палентина.
Ова неверојатно откритие не само што претставува редок генетски феномен, туку и симбол на надежта дека природата може да се обнови кога човекот ќе вложи доволно труд, внимание и љубов кон неа.
Извор: Euronews
