Skip to content
Општинските власти во градот Умиља, во шпанската покраина Мурсија, донесоа одлука со која им се забранува на исламските верници да користат јавни простори како што се културни центри и спортски центри за прослава на религиозни празници, вклучувајќи ги Курбан Бајрам и Фитр Бајрам.
Ова е прва ваква забрана во Шпанија, а предлогот го усвои конзервативната Народна партија (Partido Popular – PP), со воздржаност од крајно десничарската партија Вокс и опозиција од локалните левичарски партии.
Во одлуката се наведува дека „општинските спортски објекти не можат да се користат за религиозни, културни или социјални активности што се туѓи на нашиот идентитет, освен ако не се организирани од самата локална самоуправа“.
Локалниот одбор на Вокс се пофали на мрежата X.
„Благодарение на Вокс, беше усвоена првата мерка за забрана на исламските празници на јавни простори во Шпанија. Шпанија е и засекогаш ќе биде земја на христијански народ“.
Претседателот на Шпанската федерација на исламски организации, Мунир Бензелун Андалузи Ажари, за весникот „Ел Паис“ изјави дека станува збор за „исламофобична и дискриминаторска мерка“.
„Тие не одат против другите религии, туку само против нашата“, рече тој. Осврнувајќи се на порастот на расистичката реторика и нападите во Шпанија, тој додаде: „Запрепастени сме од она што се случува. За прв пат по 30 години, чувствувам страв“.
Дел од населението од муслиманските земји
Градот Хумиља има околу 27.000 жители, од кои околу 7,5% доаѓаат од претежно муслимански земји.
Одлуката речиси сигурно ќе биде правно оспорена бидејќи е во спротивност со член 16 од шпанскиот устав, кој гарантира „слобода на идеологија, религија и богослужба на поединци и заедници, без други ограничувања освен оние потребни за зачувување на јавниот ред, во согласност со законот“.
Лидерот на социјалистите во Мурсија, Франциско Лукас, изјави за мрежата X: „ПП го крши уставот и ја става во опасност социјалната кохезија за политичка добивка“.
Поранешната социјалистичка градоначалничка на Умиља, Хуана Гвардиола, праша: „Што точно подразбираат под идентитет? И што ќе правиме со вековното муслиманско наследство овде?“
Умиља била дел од Римското Царство до арапското освојување во 8 век. Под името Жумиља, со векови бил претежно арапски град, сè додека во средината на 13 век не бил нападнат од христијански трупи предводени од Алфонсо X од Кастиља.
Арапскиот владетел од тоа време постигнал договор познат како Капитулација на Алкатраз, според кој Алфонсо можел да биде признаен за крал под услов да ги почитува правата на постојното население. Сепак, кратко по смртта на Алфонсо, Кастиља ја нападнала Умиља, со што завршила арапската власт во тој дел од Шпанија.
