Сиљановска гледа решение во креативно толкување на Преговарачката рамка со ЕУ за Бугарија

Откако на македонските власти им стана јасно дека не може да се менува Преговарачката рамка, дека не може да има уставни измени со одложено дејство, дека Македонија преговара со ЕУ а не со Бугарија сега претседателката Гордана Сиљановска-Давкова мисли дека со креативно толкување на рамката може да се најде излез од ќор-сокакот.

Тоа Сиљановска ѝ го кажала на специјалната пратеничка на Велика Британија за Западен Балкан, Карен Пирс.

Британија веќе шест години е надвор од ЕУ, но Сиљановска на денешната средба ѝ зборувала за вредностите што треба да ги негува Унијата.

Во соопштението од кабинетот на Сиљановска се вели дека таа ѝ рекла на Пирс оти оценувањето на напредокот треба да биде меритократско, со фокус на исполнувањето на Копенхашките критериуми и укажала на „деструктивноста на билатерализацијата на преговарачкиот процес под закана со вето“.

Според неа, македонските граѓани се заситени и заморени од бројните преседани, блокади и двојни стандарди. И дека спротивно на европските темелни вредности и принципи е негирањето на националниот и културниот идентитет, како и непочитувањето на дигнитетот и интегритетот на македонските граѓани.

„Можно надминување на блокадата, претседателката гледа во креативно толкување на Преговарачката рамка и надлежноста на Мешовитата комисија за историски и образовани прашања“, стои во соопштението.

Специјалната пратеничка Карен Пирс изразила разбирање за потребата од надминување на македонската евроинтеграциска блокада.