Синот на премиерот меѓу затруените во „Димо Хаџи Димов“

Масовното труење на учениците во основното училиште „Димо Хаџи Димов“ во скопската населба Влае доби нова, политички чувствителна димензија. Помладиот син на премиерот Христијан Мицкоски е меѓу потешко затруените деца и веќе два дена е хоспитализиран со симптоми на труење и зголемена телесна температура, објави Нетпрес повикувајќи се на свои извори. Во моментов, според истите извори, детето е во подобра состојба.

Информацијата дека меѓу затруените ученици е и дете на претседателот на Владата ја подига приказната од локална училишна драма на ниво на државен тест за системот за безбедност на храната, водата и инспекцискиот надзор. Масовниот случај веќе денес ја вклучи целата вертикала – од училиштето и општината, преку здравствените институции, до Агенцијата за храна и ветеринарство и надлежните инспекторати.

Според досегашните информации, најмалку четириесет деца пријавиле симптоми – стомачни болки, нагон за повраќање и општа малаксаност – откако вчера во училиштето им бил послужен организиран оброк. Децата од пониските одделенија, кои се во целодневна настава, за појадок јаделе корнфлекс со млеко, а за ручек мусака. Првите тегоби почнале да се појавуваат по завршувањето на наставата, кога учениците веќе биле дома, а дел од нив завршиле на прегледи и во болнички кревет.

Паралелно со медиумските извештаи за бројот на заболени деца, Агенцијата за храна и ветеринарство соопшти дека, заедно со Државниот санитарен и здравствен инспекторат, Институтот за јавно здравје и Центарот за јавно здравје, спроведува вонреден инспекциски надзор во училишната кујна. Кујната е привремено затворена, а согласно националниот протокол се земаат мостри од храната, од работните површини, од приборот и од машините, како и епидемиолошки податоци од децата и персоналот. Резултатите од анализите треба да покажат дали изворот на труењето е во храната или во водата за пиење.

Дел од родителите, пак, во изјави за Рацин.мк веќе посочија дека ова не е прв пат децата да се жалат на стомачни тегоби по јадењето во училиштето. Според нивните сведоштва, и претходно имало случаи на болки и повраќање, кои биле објаснети како „изолирани“ и поврзани со лична хигиена или моментална вирусна состојба. Вчерашната масовност на симптомите, како и фактот дека меѓу затруените има и дете на премиерот, радикално ја менува перспективата – од поединечен инцидент до системски проблем.