Скопје ќе се кити со 53.000 евра

Град Скопје ќе ја чини 3.260.000 денари – околу 53 илјади евра – новогодишната декорација за претстојните празници, а работата ќе ја изведе фирмата „Линк Медиа Плус ДООЕЛ“ од Скопје, единствениот понудувач на распишаниот тендер. Според објавените податоци, компанијата и претходно добивала слични ангажмани за празнично украсување во Општина Центар и во Штип, а во минатото работела и во Кавадарци и Чаир.

Најголемиот дел од декорациите ќе бидат поставени на плоштадот „Македонија“, кој традиционално е централна точка на новогодишните збиднувања. Спецификацијата предвидува новогодишна елка висока 13 метри, 3Д фигури во форма на мечиња и подароци, големи светлосни ѕвезди, „ѕвездено небо“ од околу 800 квадратни метри лед-мразулци, како и светлосни обвивки на 25 канделабри околу плоштадот.

Освен центарот на градот, декорацијата ќе ги опфати и дел од главните градски улици и булевари. Украсите ќе бидат поставени на „Даме Груев“, „Димитрија Чуповски“, „11 Октомври“, „ВМРО“, „Гоце Делчев“, „Партизански Одреди“ и „Филип Втори Македонски“, а пред зградата на Владата ќе бидат монтирани околу 40 светлосни елементи, слични на оние што ќе ги красат булеварите.

Обврска на „Линк Медиа Плус“ е не само поставување, туку и демонтажа на декорациите по завршувањето на празничниот период. Договорот формално сè уште не е потпишан, па Градот нема објавено точен датум кога ќе почне монтирањето, но најавите се дека украсувањето ќе стартува веднаш по финализирањето на постапката, за Скопје навреме да ја добие својата празнична слика.