Skip to content
Судењето за масакрот во основното училиште „Владислав Рибникар“ во Белград денеска влегува во една од најчувствителните фази, бидејќи во Специјалниот суд треба да биде сослушан малолетникот К.К., кој на 3 мај 2023 година уби девет ученици и училишен чувар, а рани уште седум лица. Постапката е затворена за јавноста, но белградски медиуми наведуваат дека токму преместувањето на рочиштето во друга судска зграда упатува дека е предвидено негово сослушување.
Малолетникот треба да биде донесен од здравствената установа во која се наоѓа речиси три години. Неговите родители, Миљана и Владимир Кецмановиќ, од почетокот на процесот ја негираат вината, а повтореното судење следува откако Апелацискиот суд во Белград ја поништи првостепената пресуда и наложи нова постапка.
Во поништената пресуда, таткото беше осуден на 14 и пол години затвор за занемарување и злоупотреба на малолетно лице и тешко дело против јавната безбедност, додека мајката доби три години затвор за занемарување и злоупотреба на малолетно лице. Инструкторот на стрелиштето каде што момчето вежбало пукање беше осуден на една година домашен затвор за лажно сведочење. Паралелно со кривичната постапка, против семејството се водеа и повеќе граѓански постапки по тужби од семејствата на убиените и ранетите.
Случајот и натаму останува едно од најтешките и најпотресни злосторства во поновата историја на Србија, не само поради бројот на жртвите, туку и поради прашањата што сè уште ја потресуваат јавноста: како дете дојде до оружје, кој потфрли во системот и дали правосудството може да понуди целосен одговор за трагедијата што го промени регионот. Според достапните информации, К.К. во моментот на злосторството немал наполнето 14 години и затоа не сноси кривична одговорност, а нападот го извршил со два пиштола што му припаѓале на неговиот татко.