Случај „Штекли“: Судот ги соочува психијатрите, четворица веќе признаа вина

Основниот кривичен суд Скопје денес влезе во клучна фаза на предметот „Штекли“, поврзан со организирана продажба на дрога во скопската населба Аеродром. Судот треба да ги соочи психијатриските вештачења за обвинетиот Раде Трајковски – Штекли, доставени од одбраната и од обвинителството.

Одбраната тврди дека Трајковски има растројство со шизофрени карактеристики, халуцинации и параноидни идеи, поради што не е способен да ја следи постапката. Обвинителството, пак, достави наод дека тој е апсихотичен и способен да учествува во расправата.

Судијата Илија Трпков на минатото рочиште најави дека ќе ги повика вештите лица од двете страни на директно соочување. По расправата, судот ќе одлучи на кое вештачење ќе му укаже доверба или, доколку има потреба, ќе нареди ново психијатриско вештачење.

На претходното рочиште четворица обвинети – Данчо Масев, Димитар Трајков, Владимир Веселиновски и Бранислав Зајков – поднесоа предлог за признание на вина, по што судот ја раздвои постапката за нив.

Обвинението, поднесено од Обвинителството за гонење организиран криминал, моментно опфаќа 10 лица по речиси едногодишна истрага со примена на посебни истражни мерки. Првично беа опфатени 16 лица; седум од нив веќе склучија спогодби и добија затворски казни од 3 до 3,5 години.

Според обвинителството, групата била добро организирана, со јасни улоги од набавка до продажба на кокаин и марихуана. Дрогата се чувала во изнајмени станови, а се продавала по 4.500–6.000 денари за грам кокаин и 200–300 денари за грам марихуана. Комуникацијата, како што тврди обвинителството, се одвивала преку Snapchat, а клучни дигитални докази биле извадени со „Cellebrite“ системот за анализа на мобилни телефони.

По денешното соочување на вештаците, се очекува судот да донесе одлука дали ќе прифати некој од постојните наоди или ќе назначи ново вештачење.