Случајот Мекгонигал пред разврска: Поранешниот агент на ФБИ со балкански врски призна дека работел за Дерипаска

Поранешен главен контраразузнавач на ФБИ Чарлс Мекгонигал се изјасни за виновен за обвиненијата поврзани со неговата работа за озлогласениот руски олигарх Олег Дерипаска, откако федералните обвинители поднесоа нови, намалени обвиненија за заговор за кршење на американските санкции против Русија додека работел за милијардерот индустријалец.

Изјавата на Чарлс Мекгонигал, дадена вчера пред федералниот судија во Њујорк, става крај на гонењето што го шокираше ФБИ, во кое Мекгонигал со години ги истражуваше операциите на руското влијание додека се искачуваше во хиерархијата на Бирото, пишува РСЕ.

Овој 55-годишен маж, исто така, сè уште се соочува со одделни обвиненија за странски агент во Вашингтон, поврзано со работата што ја вршел за албански функционери. Обвинението покажа дека тој имал сомнителни деловни врски со политичари од Албанија и Босна и Херцеговина, како што веќе пишуваа светските медиуми.

Мекгонигал, кој се пензионираше како шеф на контраразузнавање во канцеларијата на ФБИ во Њујорк во 2018 година, првично беше обвинет од големата порота во јануари за посериозни обвиненија за перење пари и кршење на американските санкции.

Обвинителите тврдеа дека Мекгонигал и поранешен руски дипломат со кој бил поврзан, биле платени повеќе од 200.000 долари за да работат за Дерипаска, богат руски тајкун кој долго време се сметал за инсајдер во Кремљ. Дерипаска беше погоден од санкциите на американското Министерство за финансии во 2018 година.

Американските власти соопштија дека Мекгонигал бил ангажиран да ископа негативни информации за Владимир Потанин, ривалски олигарх на Дерипаска. Мекгонигал и поранешниот дипломат Сергеј Шестаков, исто така, работеле на отстранување на Дерипаска од списоците со санкции на САД.

Шестаков се изјасни за невин за посериозни обвиненија од оние што првично беа покренати против Мекгонигал.

Тие „се обидоа да ја прикријат вмешаноста на Дерипаска со, меѓу другото, непосредно именување на Дерипаска во електронските комуникации, користејќи фиктивни компании како страни во договорот во кои се наведени услугите што треба да се извршат, користејќи фалсификуван потпис на тој договор и користење на истата фиктивна компанија да испраќа и прима плаќања од Дерипаска“, се вели во соопштението за печатот од Министерството за правда откако Мекгонигал се изјасни за виновен.

Мекгонигал може да се соочи со затворска казна до пет години кога ќе биде осуден во декември.

Посебен случај покренат од федералните обвинители во Вашингтон, се фокусира на работата што Мекгонигал наводно ја вршел во име на поранешен албански разузнавач, за што бил платен 225.000 долари.

Мекгонигал, исто така, наводно го лажел ФБИ за неговите контакти со странски државјани и патувањата во странство додека сè уште бил вработен во бирото.

Дерипаска, исто така, се соочува со обвиненија за прекршување на американските санкции преку зделки за недвижнини и разработена шема во која тој наводно организирал неговата девојка да отпатува во САД за да ги роди нивните две деца.

(РСЕ/МИА)