Снегот станува смртоносен: Бројот на жртви во лавините во Австрија расте

Бројот на загинати во лавините во Австрија се искачи на осум, објавија австриските планински спасувачки екипи. Пет скијачи ги загубија животите во областа на Салцбург, додека тројца скијачи загинаа во Штаерска откако беа затрупани во лавина.

Во областа Пустервалд, во округот Муртал во Штаерска, лавина затрупа седум скијачи од Чешка доцна попладне. Тројца од нив загинаа, додека другите беа спасени, објавува австрискиот весник Кронен Цајтунг. Околу 150 спасувачи учествуваа во спасувачката операција, но потрагата по телата мораше да биде прекината поради лошите временски услови. Продолжувањето на операцијата е планирано за утре.

Порано во текот на денот, скијачка беше затрупана од лавина во близина на Салцбург на надморска височина од околу 2.200 метри. Несреќата ја пријавил нејзиниот сопруг околу 12:30 часот по локално време, но жената починала, и покрај обидите за реанимација.

Околу 14 часот, планинската спасувачка служба добила уште еден повик, откако лавина затрупала седум скијачи во алпскиот скијачки центар во долината Гросарл, на надморска височина од околу 2.150 метри. Четири лица биле пронајдени без знаци на живот, едно е тешко повредено, едно полесно, додека едно лице не е повредено. Повредените биле префрлени со хеликоптер во блиските здравствени установи.

Во текот на денот, уште две лавини биле регистрирани во австриските планини, но за среќа немало повредени во тие инциденти.

Според локалните власти, лавините биле предизвикани од самите скијачи, и покрај јасните и повторени предупредувања да се избегнуваат ризичните области. Окружниот менаџер на планинската спасувачка служба Герхард Кремзер изјавил дека ситуацијата е исклучително сериозна.

„Нашето најдлабоко сочувство до семејствата на жртвите. Оваа трагедија е болен потсетник за тоа колку е опасна моменталната ситуација со лавините“, рече Кремзер.

Службата за предупредување од лавини во Салцбург го зголеми нивото на опасност на ниво три од пет, што укажува на значителна опасност. Предупредена е дека лавините на плочите можат да бидат предизвикани дури и од мало дополнително оптоварување, а пукнатините и звуците од паѓање снег укажуваат на зголемен ризик.