Со „Отворен час“ во Прилеп одбележани 30 години од смртта на великанот Блаже Конески

Со „Отворен час“ и со почит пред споменикот во центарот на Прилеп денеска беа одбележани 30 години од смртта на великанот, кодификаторот на македонскиот стандарден јазик, академикот и писател Блаже  Конески.

Во организација на Фондацијата за македонски јазик „Небрегово“ и на прилепскиот Завод и музеј повеќе делегации од Прилеп и општина Долнени се поклонија и пооложија цвеќиња пред споменикот на Конески пред Домот на културата „Марко Цепенков“. Ученици од основното училиште што го носи името на Конески рецитираа поезија од и за Конески.

– Оддаваме почит на великанот Конески, кој засекогаш нѐ задолжи. Организиран е „Отворен час“ за сите граѓани и ученици, почитувачите на делото на Конески. Мора да споменам дека во последно време многу е посетуван Спомен-домот на Конески во Небрегово, неговата родна куќа. Пријатно сме изненадени од посетеноста. Тоа се должи најверојатно на фактот дека можеби кај нас се разбуди „македонштината“, сознаните дека Конески нѐ задолжи засекогаш, ни ја подари, како што велеше, нашата татковина, а тоа е јазикот, изјави Лилјана Неделкоска, библиотекар од прилепскиот Завод и музеј.

Музејот и Фондацијата „Небрегово“ имаат потпишано Декларација и Спомен-домот на Конески во Небрегово е ставен на туристичката мапа за посета и препорака од туристичките агенции. Што се однесува на нападите на македонскиот јазик, како што рече, нашата определба е цврста, а аргументите Конески ги има изнесено пред повеќе од шест децении.

-Отсекогаш имало и има напади на македонскиот јазик. Конески има речено: Чујте Македонци, татковината ви е дотаму до каде се говори македонскиот јазик.  Ние постојано тоа го повторуваме во Спомен-домот на Конески во Небрегово и на тоа ги потсетуваме сите посетители. Ние ја практикуваме заштитата на македонскиот јазик. Блаже Конески во 1948 година ја издал книгата по повод тогашниот најнов напад на нашиот јазик.  Во 2021 година, по повод 100-годишнината од раѓањето на великанот Конески, Фондацијата „Небрегово“ ја реиздаде книгата со што е пратена пак пораката дека неуспешни се сите обиди за нападот на македонскиот јазик, признат секаде во светот, нагласи Неделкоска