Спасовски за РСЕ: Група македонски државјани ќе добијат кривични пријави за тероризам за лажните дојави за бомби

Министерот за внатрешни работи Оливер Спасовски, во неделното интервју за Радио Слободна Европа вели дека набрзо, група на македонски државјани ќе добијат кривична пријава за тероризам поради лажните дојави за бомби во училиштата.

– За нас беше многу важно безбедноста на граѓаните, учениците на наставниот кадар да биде на највисоко можно ниво и во тој дел апсолутно не е променето ништо со протоколите, значи безбедноста мора да се сочува на едно високо ниво. Веќе поднесовме една кривична пријава против еден малолетник и практично навлегуваме во една група на лица коишто учествувале во праќањето на дојавите по електронски пат и токму користењето на ви пи ен адреси итн и сме во позиција за која за многу скоро време целата таа група ќе биде комплетно разоткриена, ќе бидат поднесени кривични пријави за делото тероризам. И ова како појава нас ни овозможи практично да направиме и промени во делот на протоколите за постапувањето, вели министерот Спасовски.

Во интервјуто за Радио Слободна Европа Спасовски додава дека кривичната пријава е за македонски државјани.

– Поднесовме кривична против едно лице малолетник, но се работи и на една друга група коишто меѓусебно се поврзани во однос на дојавите, дополнува министерот за внатрешни работи Оливер Спасовски.

Полицијата уште не може да соопшти детали за хакерскиот напад на Фондот за здравство, но имало напредок.

– Истраги се водат за сите овие институции во коишто имаше хибридни напади. Има сериозен напредок, се добиваат податоци и информации. Самиот факт дека треба овие податоци да ги обезбедиме преку меѓународна правна помош говори и за тоа дека треба да има подолго време од овој аспект, соопшти министерот Спасовски во неделното интервју за Радио Слободна Европа.